Светскиот тениски рекет број 1, Новак Ѓоковиќ, објави дека дефинитивно ќе учествува на претстојниот гренслем, Отвореното првенство на САД, кој се игра во Њујорк. Ова е одлична вест за неговите поддржувачи кои со право очекуваат тој да овои уште еден гренслем-трофеј. Патот до титулата му е олеснет со неиграњето на многу ѕвезди, меѓу кои и Рафаел Надал и Роџер Федерер, кои ќе ги нема на терените на „Флешинг Медоус“.
Ѓоковиќ, кој во моментов е во Марбелја во Шпанија, за време на престојот во САД ќе игра и на Мастерсот, кој обично се игра во Синсинати, но годинава и тој ќе биде во Њујорк, како генерална проба пред гренслемот на тврда подлога.
„Не ми беше лесно да ја донесам оваа одлука, особено земајќи ги предвид сите пречки и предизвици, но се радувам што ќе можам повторно да се натпреварувам на тениските терени“, напиша Србинот на „Инстаграм“.
Отвореното првенство на САД ќе почне на 31 август, во специфични услови, без публика и со силни здравствени мерки. Еден од услов на европските тенисери беше да се укине 14-дневниот карантин по нивното враќањ, и на тој начин да може да играат на Мастерсот во Рим и на „Ролан Гарос“.