Новак Ѓоковиќ најави дека е подготвен да настапи на гренслемот во Париз, популарниот Ролан Гарос, додека останува дилема дали Србинот ќе го гледаме и на Отвореното првенство на САД и останатите турнири кои се на распоредот до крајот на сезоната. Поради пандемијата со корона-вирусот, веќе четири месеци светскиот тениски крем е во мирување и не се играат АТП-турнирите.
Според планот на челниците на АТП, сезоната ќе продолжи кон средината на август, кога е закажан турнирот во Вашингтон (стартува на 14 август), а потоа на распоредот треба да бидат турнирите во Синсинати на гренслемот Отвореното првенство на САД.
Потоа треба да следуваат европските турнири во Кицбил, Мадрид, Рим и гренслемот на Ролан Гарос, кој е закажан за 27 септември. На официјалната страница на Ѓоковиќ е објавено дека Ноле планира да игра во Париз.
„Новак во 2016 година ја освои првата титула на Ролан Гарос и ја комплетираше четворката на гренслем-турнирите. Во 2019 година беше поразен во полуфиналето од Доминик Тим со 2:6, 6:3, 5:7, 7:5 и 5:7. Во 2020 година ќе врати 720 АТП поени“, стои на официјалната страна на Новак Ѓоковиќ.
Тениската сезона беше прекината на почетокот на март, а до тој период Ноле триумфираше на Отвореното првенство на Австралија и АТП турнирот во Дубаи. До прекинот на сезоната, Ѓоковиќ немаше ниту еден пораз во 2020 година.