Меѓународната патека за моторни трки „Кроација Ринг“, која треба да се изгради северно од градот Слуњ, доби зелено светло од Министерството за заштита на животната средина и ова ја доближува Хрватска до можноста за изградба на првата патека според највисоките стандарди на Меѓународната автомобилска федерација (ФИА), која потенцијално би можела да биде домаќин на трки и од Формула 1.
Проектот е вклучен во листата на стратешки инвестициски проекти на Република Хрватска, а планираната локација е во подрачјето на градот Слуњ, помеѓу населбите Вељун и Благај, во близина на реката Корана, на 90-тина километри од главниот град Загреб. Во близина се и Плитвичките езера, а станува збор за простор на кој сега има шума.
Патеката од 4,2 километри ќе има 12 кривини и вертикален пад од повеќе од 34 метри. Дизајнирана е според спецификациите од ФИА Степен 1, највисоката категорија за хомологација што овозможува организирање на натпревари од највисоко ниво, вклучително и Формула 1. Тоа е единствената лиценца што дозволува организирање трки од Формула 1, а во моментов има само 35 патеки во светот што ја поседуваат.
Патеката ќе има повеќе конфигурации и ќе биде наменета за трки со автомобили и мотоцикли, тестирање на возила, школи за безбедно возење и комерцијални настани.
Комплексот ќе се простира на површина од околу 50 хектари. Од нив, 40 хектари ќе бидат зафатени од тркачката зона со патека, падок, сервисни објекти и помошна инфраструктура, додека преостанатите 10 хектари се наменети за туристички и угостителски објекти.
За главните трки, кои се планира да се одржуваат еднаш или двапати годишно, планирано е да се сместат речиси 18.000 посетители. Природните трибини би можеле да сместат околу 15.000 гледачи, а планирани се и ВИП зони, медиумски центар и придружна инфраструктура за телевизиски преноси.
Изградбата се очекува да трае две години. Ќе треба да се ископаат повеќе од 1,18 милиони кубни метри материјал, додека не е исклучено ограничено минирање на дел од карпестиот терен. Во исто време, повеќе од 60 проценти од вкупната површина треба да остане под зеленило. Проектот е усогласен со Просторниот план на Карловачката жупанија, а организаторите нагласуваат дека Кроација Ринг треба да стане центар на хрватскиот мотоспорт и нова туристичка атракција во континентална Хрватска.
