Фудбалерот на Интер, Хакан Чалханоглу, ќе отсуствува од терените околу три недели поради повреда, пренесоа италијанските медиуми.
Чалханоглу се повреди минатата недела во финалето на Суперкупот на Италија, а по половина час игра против Милан (2-3) мораше да го напушти теренот поради повреда на бутниот мускул.
Поради истегнувањето на мускулот тој тренираше одделно од тимот, но се пожали и на болка во листот, па беше детално прегледан и утврдена е повреда на мускулот на листот.
„Скај Италија“ пренесе дека се очекува турскиот фудбалер да паузира две до три недели. Поради ова ќе ги пропушти натпреварите против Болоња, Емполи, Спарта Прага и Лече, а можно е да го пропушти и дуелот со Монако во Лигата на шампионите на крајот од месецот.
