Барселона веќе извесно време се обидува да најде начин како да ги добие услугите на Лаутаро Мартинес бидејќи клаузулата од 111 милиони евра за нив е висока да се плати во овој период. Интер затоа достави контрапонуда до Каталонците од која дефинитивно ќе профитираат, а воедно тренерот Конте ќе добие две одлични засилувања во составот.
Наводно, Нераѕурите бараат 90 милиони евра за Лаутаро, перманентен трансфер на Артуро Видал, кој се проценува на 20 милиони евра и едногодишна позајмица на Антоан Гриезман, со тоа што Интер ќе ја исплаќа целосната плата на Французинот следната сезона.
Оваа пакет-понуда секако повеќе одговара за италијанскиот гигант, со оглед на тоа дека ќе добие двајца квалитетни играчи од кои едниот ќе се задржи на „Џузепе Меаца“ на подолг период, а воедно 90 милиони евра ќе бидат додадени во буџетот за нови ангажмани.
На другата страна, пак, Барселона конечно ќе добие долгорочна и адектватна замена за искусниот Луис Суарес, а притоа ќе му ја исполнат желбата на капитенот Меси да се доведе неговиот сонародник на „Камп ноу“. Како и да е, оваа сага ќе го дочека крајниот епилог дури по отварањето на летниот трансфер-прозорец.
