Борусија Дортмунд во новото првенство од Бундеслигата стартуваше со убедлива победа над Ајнтрахт Франкфурт. Главна ѕвезда на мечот беше норвешкото чудо од фудбалер, Ерлинг Халанд, кој даде два гола, а имаше и три асистенции, што значи дека директно учествувал во сите пет погодоци за Милионерите.
Сепак, тоа што малку кој го примети на мечот е влијанието што го има капитенот на Борусија Дортмунд, Марко Ројс. Фудбалерот со капитенската лента на сред игра во првото полувреме комуницираше со тренерот Марко Роуз и од него побарал да има смена на формацијата.
„Ројс во еден момент дојде и ми сугерираше да играме 4-2-3-1, затоа што Ајнтрахт игра во друга формација од таа што очекувавме. Гостите играа 4-1-4-1. Му реков дека може да се смени формацијата, затоа што тој како капитен ако почувствувал дека нешто треба да се смени на теренот, тоа е добро. Браво, затоа што ја погоди формацијата. Покажа дека е вистински лидер на теренот“, откри по средбата тренерот Марко Роуз.
