Карло Анчелоти мораше да објасни зошто му упати повик на фудбалерот на Сантос и поранешен капитен на Бразил, Нејмар. Италијанецот официјално го објави конечниот список на репрезентацијата на Бразил за претстојното Светско првенство, а најголемо внимание очекувано предизвика името на Нејмар.
Искусниот офанзивец на Сантос се најде меѓу 26-те избрани фудбалери кои ќе го претставуваат Бразил на Мундијалот, и покрај бројните проблеми со повреди и фактот дека во последните години немаше континуитет каков што се очекуваше од него.
Токму поради тоа италијанскиот стручњак на прес-конференцијата доби низа прашања поврзани со статусот и физичката подготвеност на Нејмар.
Анчелоти веднаш нагласи дека стручниот штаб на репрезентацијата детално ја следел состојбата на Нејмар во текот на целата сезона и дека се задоволни од напредокот што го направил во последните месеци.
„Нејмар го следевме во текот на целата сезона. Во последно време значително ја подобри физичката подготвеност и гледаме голем напредок. Тој е многу важен играч за Бразил и ќе има голема улога на Светското првенство“, порача Анчелоти.
Сепак, искусниот тренер јасно стави до знаење дека за најголемата бразилска ѕвезда нема да има никаков посебен третман.
„Нејмар ги има целосно истите обврски како и сите останати играчи. Може да почне натпревар од првата минута, може да влезе од клупата, а може и да остане на клупата. Неговата одговорност кон репрезентацијата е идентична како и кај сите други фудбалери“, изјави Италијанецот.
Таквата изјава веднаш предизвика бројни реакции во Бразил, особено бидејќи со години често се зборуваше дека репрезентацијата премногу зависи токму од Нејмар.
Анчелоти очигледно сака да ја промени таа слика и да создаде тим во кој ниту еден поединец нема да биде над колективот, без разлика на статусот и популарноста.
Бразилските медиуми пишуваат дека токму дисциплината е една од главните работи што легендарниот стручњак се обидел да ги воведе веднаш по доаѓањето на клупата на петкратниот светски шампион.
Бразил во пресрет на Мундијалот повторно важи за еден од главните фаворити за освојување на титулата, а доаѓањето на Анчелоти дополнително ги подигна очекувањата кај навивачите.
