Германскиот фудбалски клуб Келн, официјално ја претстави својата нова маскота, козата Хенес Деветти, која го наследува Хенес Осми, кој се повлекува од „функцијата“ после речиси 12 години, и тоа од здравствени причини.
Во Келн се среќни со новата маскота која е многу слична со легендарниот Хенес Први, кој во далечната 1950 година беше земен од циркус и стана маскота на клубот.
Хенес Осми присуствуваше на многу мечеви од 2008 наваму, Келн имаше турбулентен период, играше и еврокупови, но играше и во втора лига. Тој има остеоартритис и слично како кај луѓето, тоа му создава болки и проблеми особено при неповолни временски услови.
Новата маскота е млада, уште некастрирана, родена во февруари 2018 и има долги рогови. Од август минатата година живее во Зоолошката градина во Келн. Тој останува таму, но за време на домашните мечеви на Келн, ќе биде на стадион.