Фудбалскиот клуб Дојранско Езеро доби нова управа, а на чело застанува легендарниот шоумен Игор Џамбазов. Една од најпрепознатливите јавни личности во Македонија го прифати предизвикот да влезе во фудбалските води и да се обиде да даде придонес за напредок на клубот кој е гордост на Дојран.
Покрај Џамбазов, во управата на клубот влегуваат и Мишел Истатов, кој е син на легендарниот македонски голман Благој Истатов, потоа поранешниот селектор на женската репрезентација Кирил Изов и Иле Поп Костов на функцијата секретар во клубот.
Клубот од Нов Дојран е формиран во 1978 година, а има свој стадион и одлична инфраструктура. Сезонава се натпреварува во Третата фудбалска лига-Исток, а најголемиот успех го има со настапите во Втора македонска лига.
