Еден од најпознатите рели возачи на сите времиња, Кен Блок, загина возејќи моторна санка во американската сојузна држава Јута. Блок, кој имаше 55 години, со санката возел по голема стрмнина, кога во еден момент загубил контрола, летнал во воздух, а потоа санката го поклопила.
„Со големо жалење потврдуваме дека почина Кен Блок. Тој беше визионер, пионир и икона, а пред сè, беше татко и сопруг. Многу ќе ни недостасува“, стои во соопштението од тимот на Блок, Хуникан рејсинг дивизија.
Само пред неколку дена Блок постираше фотографии од неговиот ранч во Јута, на кој се гледа и моторната санка.
This is how some mornings at my ranch in Utah look this time of year – freshly coated with snow! Luckily we have the Ski-doo sleds, @CanAm Mavericks (one on tracks!) and Defender, and the Kubota machinery to dig us out and keep the property maintained. pic.twitter.com/LXJG1A6yPr
— Ken Block (@kblock43) December 29, 2022
Блок возел заедно со неколку свои пријатели, но во моментот на несреќата бил сам. Тој беше познат како голем вљубеник на екстремните спортови, а освен во рели, се имаше натпреварувано и во скејтбординг, сноубординг и мотокрос трките.
Имаше успешна кариера во WRC, каде што двапати завршуваше и на подиумот. Стана интернет-сензација со видеата што ги снимаше, на кои покажуваше возачки вештини како возење по екстремно тешки услови, но и правење неверојатни финти.
