Долго во таборот на Лидс ќе ги боли поразот и елиминацијата од Кроули во ФА купот. Премиерлигашот, за кој цел меч одигра македонскиот репрезентативец Езџан Алиоски настрада во дуелот со членот на четвртиот по ранг систем на натпреварување во Англија, а сите голови ги прими во второто полувреме.
Кроули поведе со голот на Царула во 50. минута, а додека се разбудија од шокот, гостите примија уште еден погодок.
Лошата реакција на одбраната и на голманот Касилја ја казни Нејдесан со втор погодок во 53. минута.
Марсело Бјелса беше нервозен уште по првото полувреме и направи три измени веднаш на стартот од вториот дел и уште две во 58. минута, но Лидс доби уште една шок-терапија во 70. минута.
Туниклиф по третпат ја затресе мрежата на големиот фаворит, за уште поголема победа на Кроули таун, екипа која игра во Лига два во Англија, што е за три ранга пониско од Премиерлигата, каде настапува Лидс.
Резултати од денешните натпревари во ФА купот:
Кроули – Лидс 3:0, Манчестер сити – Бирмингем 3:0, Челзи – Морекамб 4:0, Челтенам – Мансфилд 1:1, Барнсли – Транмере 2:0, Бристол сити – Портсмут 2:1.
