Полека се откриваат деталите околу новиот трет клупски турнир во организација на Европската фудбалска куќа (УЕФА). По Лигата на шампионите и Лигата на Европа, УЕФА ќе ја промовира и Лигата на конфедерации.
Според најавите, Лигата на конфедерации треба да е трето по квалитет натпреварување во Европа. Форматот на ова натпреварување ќе биде во стилот на Лигата на шампионите. Во квалификациите ќе учествуваат 138 екипи, а потоа во групната фаза ќе влезат најдобрите 32 клуба, поделени во осум групи.
Победниците од секоја група ќе се пласираат во осминафиналето, додека второпласираните од групите ќе играат бараж-дуели со третопласираните екипи од Лигата на Европа, а подобриот ќе продолжи во нокаут-фазата. Со воведување на новата лига, ќе биде редуциран и бројот на учесници во групната фаза во Лигата на Европа. Наместо досегашните 48 екипи кои влегуваа во групната фаза, од сезоната 2021/22 во групите ќе има вкупно 32 екипи.
