Вечерва почнува четвртото коло од групната фаза во Лигата на шампионите, во кое четири екипи атакуваат на пласман во нокаут-фазата. Барселона и Јувентус од групата Г, како и Челзи и Севилја од групата Е се екипите кои со евентуални победи ќе осигураат европска пролет.
Освојувачот на Лигата на Европа од ланската сезона, заедно со Сините, доминираат во групата во која противници им се Рен и Краснодар. Двете екипи имаат по седум бода, шест повеќе од францускиот и рускиот претставник, па ако Челзи и Севилја ги освојат бодовите во Рен, односно во Краснодар, ќе бидат првите осминафиналисти во најелитното европско клупско натпреварување.
Барселона е лидер во групата Г со максимални девет бода, каков било триумф во Киев против Динамо ќе значи завршена работа за Каталонците кои вечерва ќе настапат без капитенот Лионел Меси. Јувентус е втор во групата со шест бода, односно пет повеќе од третопласираниот Динамо, па доколку Старата дама вечерва триумфира на домашен терен против Ференцварош, ќе им се придружи на Барселона, Челзи и Севилја.
Дуелите Краснодар – Севилја и Рен – Челзи се закажани во 18:55 часот, додека во 21 часот настапуваат Динамо Киев – Барселона и Јувентус – Ференцварош.
