Играчите на кинескиот фудбалски клуб кој доаѓа од градот во кој се појави смртоносниот Коронавирус, се поканети в недела во живо да го следат големото Ел Класико. Дуелот меѓу вечните ривали Реал Мадрид и Барселона ќе се игра на „Сантијаго Бернабеу“, а челниците на Примера дивисион упатија покана за присуство на играчитена Вухан Зал.
Во објаснувањето од Примера стои дека ваквиот потег е за да се покаже „поддршка за луѓето во Кина“. Челниците на Вухан Зал ја прифатиле понудата и ќе бидат на стадионот во Мадрид. Барселона како лидер ќе пристигне на „Сантијаго Бернабеу“, а Реал со победа ќе успее да стигне до првото место во Примера, што ветува дека дербито ќе биде интересно и неизвесно во текот на сите 90 минути.
Речиси и да не постои ризик дека овие играчи се заразени од Коронавирусот, затоа што клубот уште во јануари пристигнал во Шпанија на подготовки во Андалузија. Кога се рашири опасноста од смртоносниот вирус, а се одложија фудбалските мечеви во Кина, челниците на Вухан Зал одлучија да го продолжат престојот во Шпанија и на тој начин да го одложат враќањето во епицентарот на појавувањето на Коронавирусот.
