Македонската футсал репрезентација со 2:3 загуби на свој терен од Босна и Херцеговина во меч од квалификациите за пласман на Европското првенство. За Македонија ова е трет пораз и со само две нерешени средби, остана на последното место на табелата, со теоретски шанси за место на континснталната завршница.
Босанците први погодија и тоа преку Јосип Сесар во 13 минута, што беше единствен погодок во првото полувреме.
На стартот од вториот дел, израмнивме преку капитенот Дарко Ранготов во 23 минута. Нерешено беше се до четири минути пред крајот, а потоа следуваше драматична завршница.
Во 36 минута Мирко Хркач погоди за 2:1 а гостите, па Македонија реши да напаѓа со екстра играч во поле. Тоа се исплатеше и во 39 минута, Јакуп Рамадан со гол ја заврши одличната акција.
Кога делуваше дека мечот ќе заврши 2:2, Босна и Херцеговина во последниот напад стигнаа до победа.
На 12 секунди до крајот, Јелиќ шутираше, нашиот голман за кратко ја испушти топката, а потоа ја собра во своите раце. Молдавскиот судија Бугенко оцени дека топката ја поминала гол-линијата со целиот обем и досуди погодок за БиХ, што беше доволно за победа од 3:2.
За Босна и Херцеговина ова е петта победа во исто толку дуели од квалификациите.