Македонската кошаркарска репрезентација загуби на гостувањето кај Романија, но сепак се радува на пласманот во квалификациите за пласман на Европското првенство до 2021 година. За Македонија ова е прв пораз во претквалификации, но и тоа е доволно да го задржиме првото место во групата, пред Романија и Косово. Во четирите меча, Македонија има три победи и еден пораз, а најважно е тоа што вечерва од Романија загубивме со негатива помала од 13 разлика. Во Скопје ги победивме со 90:76 и тоа е разликата поради која Македонија е прва во групата, а Романија ќе остане зад нас.
Македонија само во првата четвртина покажа добра игра. На почетокот поведовме со 8:3, а по првите 10 минути водевме со 16:15. Потоа едноставно како да застанавме, а Романија почна да ја зголемува предноста. На полувреме, Македонија имаше негатива од пет разлика (34:29), а веќе на почетокот на третата четвртина, Романија стигна до плус 8 (37:28)
На две минути до крајот беше 62:50, кога погоди Бојан Трајковски. Романците дадоа тројка на 45 секунди до крајот и стигнаа до 65:52. Ние повторно утнавме, па Вотсон имаше шут за тројка за Романија да стигне над 14 разлика, но не погоди. Хендрикс со дефанзивен скок се избори за топка за Македонија, а натурализираниот Македонец на 6,2 секунди до крајот погоди едно слободно фрлање, а Романија не успеа да направи акција за напад, па Македонија загуби со 65:53, но ја оствари целта и се пласираше во квалификациите за ЕП 2021 година.
Дамјан Стојановски со 13 поени беше најефикасен кај Македонија, брат му Војдан додаде 12 поени, а Хендрикс заврши со 8 поени. Во листата на стрелци се запишаа и Симоновски со 6 поени, Трајковски даде 5, Ѓуроски 5 и Магдевски со 4 поени.
