Македонските одбојкари го освоија третото место во Сребрената европска лига по победата во пет сета против Унгарија.
Популарните Спартанци постојано водеа во малото финале и успеаа да слават во долг меч со 3:2 во сетови.
Првиот сет заврши со 25:22 за Македонија, а Унгарците веднаш возвратија со 25:18 и израмнија на 1:1 во сетови.
Третиот сет мина во комплетна доминација на бронзените момци од Македонија и заврши убедливо наша корист со 25:15.
Унгарија повторно израмни и го доби четвртиот сет со 25:19, но ривалот немаше сила за комплетен пресврт и подобрата репрезентација ја освои бронзата.
Бевме одлични кога најмногу беше потребно и го добивме последниот скратен сет со 15:7 за конечна победа од 3:2 и бронзен медал во Сребрената европска лига.
Во финалето од 19 часот ќе играат Финска и Романија.
