Металург ќе ја предводи групата Б во новата сезона во ракометниот шампионат на Македонија, а со најквалитетната екипа од вкупно 14 што ќе играат во првиот дел од сезоната се уште и Бутел, Работнички, Тиквеш, Пелистер 2, Прилеп и Младост од Богданци.
Во групата А, каде што топ-носител беше Охрид, ќе играат и Пролет, Радовиш, Струга, Астарион, Јуниор и дебитантот КЛ7, екипа што е сопственост на нашиот легендарен ракометен ас, Кирил Лазаров.
Во првата фаза ќе играат вкупно 14 екипи, а по три од двете групи ќе се пласираат во плејофот за титулата, каде што ќе се приклучат сè уште актуелниот европски првак Вардар и гигантот Пелистер.
Сите останати екипи ќе играат во плејаут лигата за опстанок, а само најдобрата од тој сегмент ќе има билет за елитното македонско друштво и за следната сезона.
Стартот на натпреварите во најквалитетната македонска ракометна лига е закажано за 12 септември, со мечеви од првото коло во двете групи.
