Бразилскиот дефанзивец Едер Милитао, по трансферот од Порто во Реал Мадрид не доби премногу шанси да покаже што знае, беше резерва на Серхио Рамос и Рафаел Варан, а в петок на гостувањето кај Манчестер сити од реванш осминафиналето во Лигата на шампионите ќе биде стартер, бидејќи Рамос е суспендиран, откако пролетоска доби црвен картон во поразот во Мадрид од 1-2.
За Милитао кој има 22 години, Реал плати дури 50 милиони, и дуелот со Граѓаните ќе биде вистински тест за неговите можности. Милитао тврди дека е подготвен за предизвикот и ветува дека ќе биде соодветна замена за капитенот.
„Ова ќе биде натпревар на кој ќе имам шанса да покажам дека Реал може да смета на мене и на тешки натпревари. Добро сум подготвен, имам самодоверба, верувам дека ќе одиграме добро и ќе победиме. Сити има многу добри напаѓачи, би го издвоил мојот сонародник Габриел Жезус. Рамос е нашиот гладијатор и капитен, ќе ни фали, но јас сум тука, верувајте во мене. Посакувам првиот гол за Реал да го постигнам во Манчестер и тоа да биде со глава и победнички гол. И за Азар ова е многу важен меч, тој може многу да ни помогне“ – вели Милитао.
