Младинците заслужуваат поддршка, победата над Казахстан ќе биде чекор до ново ЕП

Дуелот меѓу македонската фудбалска репрезентација за играчи до 21 година против Казахстан ќе се одигра денеска, во 14.30 часот на тренинг-центарот „Петар Милошевски“ во Скопје. На нашите таленти им треба поддршка, ја заслужуваат.

Тимот на селекторот Благоја Милевски ги доби мечевите со Фарски Острови (7-1) дома и на гости со Црна Гора (2-1), па води во групата од квалификациите за Европското првенство 2021 година.

Милан Ристовски смета дека овој натпревар против Казахстан ќе биде различен од претходните. И Казахстанците славеа на гости кај Црна Гора со 2-1, нивните 6 бода ги освоија како гости, додека дома губеа од Шпанија и Израел. Но, нашите се убедени дека со правилен пристап, може да се издвојува нова победа во групата.

„Против Црна Гора остваривме значајна победа, иако натпреварот воопшто не беше лесен. Сепак, и покрај некои наши грешки и недостатоци во играта за кои зборувавме и работевме со селекторот и стручниот штаб, успеавме да победиме и да го добиеме посакуваниот резултат. Натпреварот со Казахстан ќе биде сосема поразличен. Противникот е квалитетен, физички се силни, но сметам дека со правилен пристап, можеме да дојдеме до нови три бода. Не се сомневам дека заеднички повторно ќе дадеме сѐ од себе и на крајот ќе се радуваме“, изјави Ристовски.

- Оглас -

Најнови вести