Моќно, една од најголемите победи на наш тим – Пред 17 години Вардар тргна храбро и ја покори Москва (Видео)

Големата армија на навивачи на Вардар сè уште го паметат 30 јули во 2003 година како ден во кој нивниот миленик забележа една од најзначајните победи во 73-годишната историја на клубот.

Во Москва, во второто квалификациско коло за пласман во Лигата на шампионите на денешен ден се играше првиот меч меѓу ЦСКА Москва и Вардар, а македонскиот тим славеше со 2:1. Победа што потоа беше одбранета во Скопје со реми 1:1 за пласман во третото квалификациско коло и епски двомеч со Спарта Прага.

Вардар тргна на пат кон главниот град речиси прежален, но се врати како херој со сензационална победа. По два брзи контранапади, Влатко Гроздановски и Дош Сантош Вандеир со голови во 54-тата и во 64-тата минута го нокаутираа апсолутниот фаворит, кој потоа намали на 1:2, но не успеа да се закрепне од шокот ниту во Москва, ниту 7 дена подоцна во Скопје, па Вардар излезе како победник во двомечот.

Во една анализа на руските медиуми, поразот на ЦСКА Москва од Вардар и елиминацијата на рускиот гигант од нашиот најтрофеен клуб беа прогласени за најголем фудбалски дебакл во историјата на клупскиот спорт во Русија.

Скопје и Македонија во жешкото лето пред 17 години ги тресеше невидена фудбалска грозница, а двата двомечи со ЦСКА Москва и потоа со Спарта Прага, што, за жал, Вардар го загуби, се меѓу најдраматичните спортски настани во историјата на македонскиот спорт.

- Оглас -

Најнови вести