Екипата на МЗТ Скопје Аеродром дополнително го засили ростерот за новата сезона откако денеска беа ангажирани уште двајца интернационалци, и тоа Американецот Џабари Хиндс (27 год, 181 см) и Хрватот Марин Морнар (26 год, 205 см), кои потпишаа едногодишни договори.
Станува збор за кошаркари со повеќе од солидно европско искуство, од кои се очекува да бидат од голема помош во обидот да се дојде до зацртаните цели, а тоа е одбрана на титулата, враќање на куп-пехарот и борба за врвот од табелата во АБА2-лигата.
Хиндс, кој игра на двете бековски позиции, доаѓа со епитетот најдобар стрелец во Полска настапувајќи за екипата на Кросно, во која на 30 средби просечно реализирал 21,7 поен заедно со 5,1 асистенција и 2,8 скока. Претходно, настапувал две сезони за Вест Вирџинија универзитетот, а толкав период минал и во дресот на екипата од Универзитетот Масачусетс. Европската кариера ја почнува во тимот на Сигал Приштина, потоа се сели во Унгарија, каде што игра за Атомерому.
Морнар е крилен центар, а иако е роден во Загреб, нема настапувано за тим од Хрватска. Првите сериозни кошаркарски чекори ги прави во дресот на Универзитетот Лајола Меримаунт, за којшто настапува во периодот од 2012 и 2016 година. Најдобар учинок имал во претпоследната сезона во овој тим од НЦАА-лигата, кога просечно реализирал 9,9 поени со 5,3 скока.
Европската кариера ја почнува во данскиот прволигаш Хорсенс (2016/17), додека следната година игра за шведскиот тим Борас. Јавноста на просторите од поранешна СФР Југославија подобро го запознава лани, кога потпиша за црногорскиот АБА-лигаш Морнар. Таму не се задржа долго, па по одиграни 11 средби сезоната ја доврши во австриската екипа Флајерс Велс.
Претходно, за МЗТ Скопје Аеродром потпиша кенискиот интернационалец Нуни Омот, кој во македонската престолнина се очекува да пристигне во текот на следната недела, исто како и новоангажираниот двоец Морнар-Хиндс. Тренерот Ѓорѓи Кочов од вчера тренира со шестмината репрезентативци кои се под договор со нашиот тим, и тоа: Дамјан Стојановски, Марко Симоновски, Кристијан Николов, Андреј Магдевски, Андреј Маслинко и Бојан Крстевски, заедно со пет помлади кошаркари чие време допрва доаѓа, како Иван Волкановски, Ранко Мамузиќ, Леонид Тодоровски, Бојан Стојановски и Љубиша Димитровски.
