Црвениот картон кој го доби Гонзало Игуаин на дербито Милан – Јувентус играно на 11 ноември на „Сан Сиро“, предизвика доста полемики во италијанските и европските фудбалски кругови, а казната за аргентинскиот напаѓач за стореното дело ќе биде два меча неиграње.
Во Милан сметаа дека двата жолти картони за приговор се неоправдани, се жалеа на одлуката и бараа казната да биде намалена на еден меч. Но, федералниот апелациски суд во Рим откако го слушна исказот на фудбалерот и ги зеде сите околности во предвид, ја одби жалбата, па популарниот Пипита нема да може да игра на средбите од Серија А против Лацио и Парма.
Игуаин нормално тренира со екипата, веруваше во позитивен исход, но судот пресуди дека сепак треба да одлежи суспензија од два, а не од само еден натпревар.
