Репрезентативниот голман Никола Митревски се врати во шампионот Е. Пелистер, кој во новата сезона ќе ја напаѓа „тројната круна“ на домашната сцена. Секако, тимот ќе се обиде да остави и многу подобар впечаток во Лигата на шампионите, а Митревски треба да биде еден од главните адути.
„Секогаш е убаво кога се враќаш дома, без разлика дали кратко или долго. Оваа приказна со Еурофарм Пелистер трае и чест и задоволство е што пак имам шанса да бидам дел од екипата во која што почнав да играм, пред своите сограќани, во својот град. Во овој клуб се работи правилно, доказ за тоа е што се доби „вајлд-карта“ за ЛШ. Еурофарм Пелистер оди по правата линија кон успехот. Ќе бидеме дел од кремот на европскиот ракомет, исто така и публиката ќе има можност да присуствува на спектакли каде секој меч е посебно доживување. Екипата е спој на домашни и странски играчи, искусни и помалку искусни. Очекувам да бидеме сплотени и сите заедно да ги оствариме клупските цели кои се пред нас“, изјави Митревски по претставувањето.
Македонскиот репрезентативец се враќа на домашната сцена од португалскиот Порто.
