Новак Ѓоковиќ ги разреши сите дилеми околу тоа како ќе реагираат организаторите на првиот гренслем-турнир во годината, Отвореното првенство на Австралија, кога се работи за невакцинираните тенисери. Организаторите дозволија учество и на невакцинираните тенисери, но дадоа еден услов, а тоа е дека секој невакциниран што ќе влезе во државата, ќе мора да помине две недели во карантин.
Дури и премиерот на Австралија, Скот Морисон, потенцираше дека нема да има никаков попуст за Ѓоковиќ и дека Србинот ако реши да игра на турнирот во Мелбурн, ќе мора да оди во двонеделен карантин затоа што е невакциниран.
„Истите правила важат за сите луѓе. Без разлика дали се работи за победник на гренслем-турнир, премиер на некоја земја, трговски патник, студент или некој друг човек. Сите мора да поминат во двонеделен карантин“, изјави премиерот Морисон.
Гренслемот во Австралија се игра во јануари следната година, а дотогаш прво ќе се играат два големи турнири, и тоа во Париз и завршниот Мастерс во Торино, по кои Ѓоковиќ се надева дека до крајот на годината ќе ја задржи челната позиција на АТП-листата.
