Ајакс е вистински расадник на таленти, ја има веројатно и најдобрата Академија за млади играчи на светот, а фудбалерите до 19 години на тимот од Амстердам им направија одлична најава на сениорите вечерва пред дуелот со АЕК во Атина.
Избраниците на Џони Хејтинга ги декласираа врсниците од АЕК со импресивни 8-1 на гостински терен, што е највисока победа на тимот до 19 години во натпреварите од Лигата на шампионите за младинци.
Вечерва, од 18.55 часот сепак за Ајакс поважниот меч е тој на сениорите против АЕК во Атина. Популарните „копјаници“ ќе се пласираат во нокаут-фазата во Лигата на шампионите со победа против отпишаниот АЕК или дури и да не победат, ќе одат во осминафиналето ако Бенфика не успее да го победи Баерн во Минхен.
Двете варијанти се сосема реални и Ајакс да го победи АЕК, но и Бенфика да не слави против лидерот во групата Е, Баерн.
Во прилог на Ајакс е и традицијата, која е на страната на гостите. Тие во досегашните три меѓусебни дуели го победуваа АЕК и имаат импресивна гол-разлика од 7-1 против грчкиот тим. Со гол повеќе нивните младинци денеска ги декласираа врсниците од Атина, што е одлична најава за нов триумф на фаворитот од Холандија.
