Египќанецот Езелдин Бахадер влезе во книгата на Гинисови рекорди откако го одигра својот втор целосен натпревар во египетската трета лига и го исполни условот да биде прогласен за највозрасен професионален фудбалер на светот. Езелдин на 3 ноември ќе наполни 75 години и сега може да се пофали дека нема постар фудбалер на светот од него.
Бахадер во дресот на тимот 6 Октомври утна пенал и неговиот тим загуби од Ел Ајат со 2-3. Но, во март на дебито, кога исто така одигра цел меч, дедо Ез како што го викаат, даде гол од пенал. Потоа корона-вирусот го прекина првенството, а сега откако продолжи, тој го исполни условот за Гинис.
Бахадер има шест внуци кои стоеја покрај теренот и го бодреа дедо им. Стариот рекорд го држеше 73-годишниот Израелец Исак Хајик, а Бахадер сака и по 75-тиот роденден да одигра уште три меча, па уште повеќе да го подобри рекордот.