Најдобриот тенисер на светот, Новак Ѓоковиќ, не сака јавно да каже дали се вакцинирал против Ковид-19 или не, но неизвесноста околу оваа тема ќе заврши најдоцна во јануари.
Австралиските власти ги официјализираа оние најави што се однесуваа на настапот на Отвореното првенство на Австралија. На првиот гренслем во 2022 година, од 17 до 30 јануари, дефинитивно ќе смеат да играат само тенисер(к)и кои примиле две дози вакцина против корона-вирусот.
Ѓоковиќ, но и некои други тенисери од Топ 10 на АТП-листата, како Данил Медведев и Александер Зверев, или не се вакцинирани или не сакаат да кажат дали се вакцинирани, па постои можност тие и да го пропуштат турнирот во Мелбурн. Стефанос Циципас рече дека ќе се вакцинира само ако тоа стане задолжително.
Србинот Ѓоковиќ е најуспешен тенисер во историјата на АО, а ако триумфира и во јануари, ќе ги надмине Федерер и Надал и ќе стане тенисер со најмногу гренслем-титули во историјата.
