Без наслов - Страница 9710

Гребиј се повреди, не игра против Вардар

-

13.09.2018

Бранителот на трофејот во ракометната Лига на шампиони, тимот на Монпелје, против Вардар ќе настапи без левиот бек Матје Гребиј. Французинот има проблеми со грбот, го пропушти и мечот против Тулуз во второто коло во француското првенство, а по сите изгледи нема да биде достапен за тренерот Канаје и на отворањето на новата сезона во европскиот клупски шампионат.

Во редовите на францускиот тим недостасува и левото крило Мишел Гигу, кој ќе паузира неколку месеци поради повреда на коленото.

Одбраната на европскиот пехар Монпелје ја започнува во сабота (17:30 часот), токму против македонскиот претставник Вардар, тимот кој лани го елиминираа Французите за пласман во големото финале.

ФИФА воведува ново правило, Челзи и Јувентус на удар

Томас Ѓорѓиевски

-

13.09.2018

0

ФИФА крои планови како да го спречи прекумерното позајмување играчи со цел да се ограничи профитот од ваквиот тип трансфери. Светската фудбалска куќа планира да го лимитира бројот на позајмени играчи од еден клуб на осум, што ќе биде голем проблем за клубовите како Челзи и Јувентус.

Клубовите не ќе можат да позајмат повеќе од осум играчи кои имаат повеќе од 21 година, додека домашните фудбалери се исклучок, фудбалерите кои потекнуваат од земјата на клубот ќе можат да одат на привремен ангажман во друг домашен клуб.

Главниот проблем во овие позајмици е начинот на заработка на големите клубови. Тие купуваат неколку млади играчи речиси секој летен период, за потоа веднаш да ги испратат во други клубови каде што би добивале шанса и би стекнувале искуство. Во случај да покажат потенцијал, клубовите ги продаваат истите играчи за нереални цени, притоа заработувајќи чист профит.

Премиерлигашот сезонава позајми 40 фудбалери во повеќе клубови, идентична цифра како и минатата сезона, додека италијанскиот првак Јувентус лани позајми 45 фудбалери. Многумина од нив никогаш нема да успеат да се наметнат во првиот тим, но затоа на клубовите им ги полнат касите.

Доколку овој предлог се усвои, клубовите исто така ќе бидат ограничени во купувањето на играчи во една година. Во летниот и зимскиот период еден клуб ќе може да купи најмногу осум играчи.

Канаѓаните останаа перфектни, втора победа и за Полска

Томас Ѓорѓиевски

-

13.09.2018

0

Канада останува перфектна во групата Б по два одиграни меча. По триумфот над холандската селекција со 3-0, Канаѓаните денес со иденчитен резултат беа подобри од Египет (27-25, 30-28, 25-19). Николас Хоанг беше најдобар во составот на Канада, со 24 поени, додека втор двоцифрен по бројот на поени беше Џон Гордон Перин. Ахмед Шафик беше најефикасен за египетската репрезентација, реализараше 17 поени.

Полска, исто така, забележа убедлив триумф, со конечни 3-0 (25-14, 25-12, 25-15) беше подобра од јужноамеринаската репрезентација на Порторико. Сливка и Биниек беа најзаслужни за втората победа за полскиот состав, со 13, односно 12 поени, а како трет најефикасен заврши Кончановски. Маурис Торес со осум поени е најдобриот поентер за Порторико.

Тотенхем без Љорис и Али ќе атакува на Ливерпул

Томас Ѓорѓиевски

-

13.09.2018

0

Голманот и капитенот на Тотенхем, Уго Љорис, поради повреда на бутниот мускул, ќе отсуствува од терените неколку недели. Со слични проблеми се соочува и младата англиска ѕвезда Деле Али, кој ги повреди препоните за време на репрезенативната пауза, но неговото закрепнување ќе трае само неколку дена.

Ова се лоши вести за менаџерот на „спарсите“, Маурисио Покетино, само на два дена од закажаното дерби против Ливерпул во Премиер лигата.

„Секако дека сум разочаран, но ситуацијата е таква и ќе мора да се соочиме со Ливерпул без Али и Љорис. Затоа постојат измени и алтернативи“, истакна Покетино.

Она што може да ги израдува фановите на Тотенхем и да им даде надеж за победа е враќањето на Сон Хонг-Мин во составот, откако офанзивецот ги заврши репрезентативните обврски на Азиските игри, каде што со Јужна Кореја стигна до златниот медал.

Трајковски бил соиграч со тројца косовски репрезентативци

Трајан Маневски

-

13.09.2018

0

Крилниот центар Бојан Трајковски добро ја познава салата во Приштина, каде што вечерва ќе се игра мечот Косово – Македонија, а тој делеше иста соблекувална и со тројца косовски репрезентативци кои ќе се најдат од другата страна на средбата од претквалификациите за Евробаскетот 2021.

Додека играше за косовскиот клуб Сигал Приштина, а тоа беше по неколку месеци во две различни сезони, Трајковски беше клупски колега со Фисник Ругова, Дардан Бериша и Леонард Мекај, кои вечерва ќе бидат во составот на селекторот Дамир Мулаомеровиќ.

Трајковски во 2015 година, како член на Приштина, освои тројна круна, поточно шампионската првенствена титула и Купот на Косово, како и трофејот во регионалната Балканска лига БИБЛ.

Иако и на стручниот штаб на македонската репрезентација добро му се познати квалитетите на Бериша, кој е главен поентер на Косово, сепак,вдобредојдени може да бидат информациите на Трајковски, кој одлично го познава косовскиот бек кој своевремено настапуваше и за репрезентацијата на Полска.

Мајкл Џордан „влезе“ и во Пари Сен Жермен

Трајан Маневски

-

13.09.2018

0

Влијанието на Мајкл Џордан преку неговата спортска марка „Аир Џордан“ добива нова димензија. Откако стана главна во кошарката, а потоа се рашири и на останатите спортови низ Америка, сега влегува и во фудбалот. И тоа не каде било, туку директно во редовите на францускиот првак Пари Сен Жермен.

Денеска во Париз беше промовирана новата опрема на „светците“ со заштитниот знак на Мајкл Џордан. Американската фирма ќе пушти повеќе од 90 различни продукти со амблемот на ПСЖ, каде што главни ѕвезди се Нејмар, Килјан Мбапе и Единсон Кавани.

Двете страни се договориле да склучат договор на три години, а Џордан верува дека францускиот клуб е вистинско место за да се промовира во фудбалот. Веќе неколку години ПСЖ е доминантен во Франција, а тимот се надева дека сезонава може да има историска година и во Лигата на шампионите, која никогаш ја нема освоено.

Мулаомеровиќ: Мечот со Македонија е најважен за нас

Трајан Маневски

-

13.09.2018

0

Дамир Мулаомеровиќ како селектор на националниот тим на Косово во пресрет на пресметката со Македонија, која е негова дебитантска како предводник на нашите соседи, смета дека вечерашниот меч е клучен за Косово во оваа претквалификациска фаза.

„Групата е тешка, можеби и најтешка во овие претквалификации, но верувам во својот тим. Момците ја извршуваат секоја задача. Мислам дека најважен ќе биде овој натпревар со Македонците, бидејќи по ова, имаме гостувања во Скопје и Романија. Мораме да водиме сметка и за кош-разликата. Знаеме дека салата ќе биде полна, интересот е голем, а наше е да дадеме максимум и да одиме на победа“, вели 43-годишниот Мулаомеровиќ.

Новиот селектор на Косово верува дека успеал да ја смени филозофијата на тимот и дека тимот ќе биде и психички подготвен. На располагање го имаат и истиот натурализиран играч кој настапи за Косово и лани во Скопје, тоа е Скот Бамфорт.

„Македонија има добар тим. Тоа што им се приклучи Ричард Хендрикс, не ги менува нашите планови. Ги повикувам навивачите да дојдат во голем број бидејќи овие играчи заслужуваат голема поддршка“, изјави Мулаомеровиќ.

Вардар ја има втората најдобра атмосфера во ракометната Европа

Трајан Маневски

-

13.09.2018

0

Доскорешниот тренер на Вардар, Раул Гонзалес, го доби признанието за најдобар стратег во Лигата на шампионите за минатата сезона. Така решија сите тренери кои гласаа во традиционалниот избор кој го спроведува Европската ракометна федерација (ЕХФ) пред стартот на новата сезона во ЛШ.

Актуелниот македонски ракометен селектор, а сега тренер на Пари Сен Жермен, доби 18 гласови и за еден глас беше подобар од предводникот на европскиот првак Монпелје, Патрис Канаје.

Атмосферата која навивачите на Вардар ја создадаваа минатата сезона во „Јане Сандански“ е на второ место во гласањето. Како подобри навивачи се покажале само фановите на Веспрем.

Во идеалниот тим кој го одбраа тренерите место имаше за некогашните Вардарци, Арпак Штербик (голман) и Лука Циндриќ (централен бек). Меѓу најдобрите се и Уве Генцхајмер (лево крило), Микел Хансен (лев бек), Давид Балгер (десно крило), Дика Мим (десен бек) и Лудовик Фабрегас како пивот.

Креативно: Во Лајпциг има „тркало на казните“

Трајан Маневски

-

13.09.2018

0

Креативно решение за тоа како да ги дисциплинира непослушните фудбалери смислил тренерот на Лајпциг, Ралф Рангник.

Стратегот на бундеслигашот направил „тркало на казните“. Секој оној што ќе задоцни на тренинг, нема да ги слуша неговите задачи и ќе отстапи од правилата во клубот, ќе има можност да си ја проба среќата на „тркалото на казните“.

За разлика од традиционалните и стандардни парични казни кои се применуваат во останатите клубови, во Лајпциг има друг вид казни. Тркалото може да застане на „три часа работа во клупската продавница“, „да ја искоси тревата на стадионот“, „да исчисти дел од трибината“, „да послужи храна во клупското бифе“, „да им купи подароци на сите во клубот“ или „да биде водич на оние кои сакаат да го разгледаат стадионот“.

Сите овие казни и не се толку лоши, а фудбалерите најмногу се плашат „тркалото на казните“ да не застане на „да го одработи тренингот облечен како балерина“. По овој нов метод на казнување на тренерот Рангник, фудбалерите сигурно многу повеќе ќе внимаваат.

Дресовите на Барди одат како алва

Зоран Поповски

-

13.09.2018

0

Македонскиот репрезентативец Енис Барди станува сè повлијателен во Леванте, па и во шпанската Ла Лига, а „Марка“ објави дека играчот од средниот ред е во топ 3 играчи на својот клуб според продажбата на дресовите.
Десетката на Барди е најпродавана, по тие на соиграчите Хозе Моралес и Роџер Марти. Или по редослед, дресовите со броевите 11, 9 и 10 се најбарани во Валенсија, од каде што е Леванте. Секако, ова е клупско рангирање, но и голем комплимент за игрите и односот на Барди.
Нашиот репрезентативец ја игра само втората сезона во Ла Лига и во Леванте, а веќе е во друштво на капитенот Моралес и на Роџер, кои се многу подолго од него во клубот.
Дебитантската сезона, лани во Леванте, Барди ја одигра брилијантно. Неговите слободни удари беа сензационални за шпанските љубители на фудбалот, а со девет голови нашиот репрезентативец беше меѓу најефикасните кај Леванте.