Македонскиот суперлигаш Пелистер го доживеа третиот пораз во ФИБА Европа купот откако вечерва на домашен терен загуби од Цедевита Јуниор со убедливи 74-95.
Со ова битолскиот тим остана на последното место на табелата, а пласманот во топ 16 фазата останува само теоретска опција.
Пелистер беше конкурентен само во третата четвртина, кога успеа целосно да ја достигне високата предност на Цедевита Јуниор и да израмни на 56-56. Од финишот на првата четвртина, Хрватите држеа двоцифрена предност, но битолчани се доближија со серија од 11-0 за 48-52 и потоа израмнија.
Сепак, не го издржаа темпото, Цедевита Јуниор возврати со 12-2 за нова двоцифрена предност, средината на последната четвртина ја започнаа со 62-81, а наскоро потоа разликата порасна на 23 поени (68-91).
Најефикасен кај Пелистер беше Дејвис со 21 поен, додека Вилсон постигна 16, а Митревски 15. Најголемо разочарување беше најдобриот стрелец на тимот, Остин Прајс, кој речиси за 20 минути постигна само два поена со шут од игра 1/9.
Во следното коло, Пелистер ќе гостува кај Приевидза, единствената екипа која ја победи во досегашниот дел од сезоната.
