Женската ракометна репрезентација на Македонија до 19 години со пораз стартуваше на Европското првенство. Нашите млади надежи загубија од врсничките на Црна Гора со 33:29.
Избраничките на Јулијана Црвенкоска беа рамноправен противник во првото полувреме. Црна Гора отвори со 3-1, потоа водеше и со 7-4, но потоа Македонија со серија од 4-0 дојде до водство од 8:7 во 11-тата минута. Водството од еден гол Црвено-жолтите го имаа до пред пет минути пред крајот на првиот дел. Тогаш Црногорките со серија од 3-0 поведоа со 17-15, а на полувреме имаа предност од три погодоци (19-16).
Во вториот дел Црногорките постојано ја контролираа предноста. Брзо стигнаа до пет гола позитива и до крајот без проблем стигнаа до победа. Стефаноска и Јанкулоска со шест постигнати гола беа најефикасни кај Македонија, а по четири погодоци имаа Дукоска и Коцева.
Македонија утре го игра вториот меч, за противник ја има селекцијата на Данска.
