Првиот човек на африканската држва Мадагаскар, претседателот Андри Раџолина, ќе испрати чартер лет за 480 фудбалски навивачи до Египет, каде што се игра Африканскиот куп на нациите, но трошокот ќе биде на сметка на фановите.
Мадагаскар, кој е остров во Индискиот океан, неочекувано стигна до осминафиналето на Афкон, нацијата е во фудбалска еуфорија, но бидејќи нема директен комерцијален лет од Мадагаскар до Египет, претседателот се погрижи да испрати еден голем авион со 480 седишта за мечот в недела, против Демократска Република Конго. Мадагаскар е на 108-мото место на ФИФА-листата, а Конго е 49-ти.
„Ги послушавме барањата на навивачите, па претседателот одлучи да испрати ’ербас 380’ со 480 седишта, за транспорт на фановите“, рече портпаролот на претседателот на Мадагаскар.
Сепак, авантурата нема да биде гратис и на сметка на државата. Сите што ќе се најдат во авионот, ќе треба да платат по околу 530 евра за авионски билет, билет за фудбалскиот натпревар и ручек.
Денеска се играат првите две осминафиналиња, Мароко – Бенин и Уганда – Сенегал, додека Мадагаскар игра в недела, од 18 часот.
