Mеѓу два големи европски предизвици против Баерн Минхен за пласман во финалето од Лигата на шампионите, тимот на Пари Сен Жермен го пречека Лориен во 32-то коло од француската Лига 1 и ремизираше 2-2.
Парижани настапија во комбиниран состав, со повеќе ротации и одмор за клучните играчи. На клупата беа дел од ѕвездите како Дембеле и Кварацхелија, додека голманот Сафонов не беше ниту во протоколот. Тоа Лориен знаеше да го искористи и да извлече бод на „Паркот на принцовите“.
Домаќините поведоа уште во шестата минута. Дезире Дуе центрираше од левата страна во петерецот, а Ембаје најдобро се снајде и, и покрај двајца противнички играчи, ја смести топката во мрежата за 1-0.
Сепак, Лориен брзо возврати. Само шест минути подоцна, Кацерис нафрли од десната страна, топката долго патуваше низ шеснаесетникот, а збунетата одбрана на ПСЖ дозволи Паџис од близина да израмни на 1-1.
Тој резултат важеше до 62-та минута, кога домаќините изведоа воиграна акција по прекин. Дуе повторно асистираше, овојпат за Заир-Емери, кој од околу 20 метри упати прецизен удар по земја. Топката, сепак, го смени правецот по контакт со еден гостински играч и го измами голманот за 2-1.
Но, Лориен повторно не се предаде. Во 78-та минута Тосан тргна во брз контранапад и реализираше за конечни 2-2.
