Карим Адејеми има само 19 години, но сигурно ќе биде една од ѕвездите на летниот преоден рок и по големиот интерес за него од Баерн Минхен, сега и Пари Сен Жермен најавува дека ќе се вклучи во трката за ангажман на фудбалерот на Ред Бул Салцбург.
Во ПСЖ се свесни дека Килијан Мбапе е на заминување бидејќи неколкупати одби да го продолжи договорот и од јануари веќе ќе може да преговара со заинтересираните клубови, а ги има многу. Како замена го подготвуваат токму 19-годишниот Адејеми.
Карим игра одлична сезона и веќе постигна 10 гола во 11 кола во австриското првенство, со што е прв стрелец. Вкупно сметајќи ги сите настапи во сите натпреварувања сезонава има дадено 14 гола и запиша две асистенции, од кои едната ќе ја памети долго.
Адејеми играше за германската репрезентација во Скопје против Македонија пред две недели, кога гостите не прегазија со 4:0, а тој при последниот гол на Мусијала беше асистент. Тоа му е прва асистенција како член на националната селекција на четирикратнот светски првак.
Претходно и Баерн најави дека има сериозни намери да го купи Адејеми од Салцбург уште во јануарскиот преоден рок, а и тие се подготвуваат за заминување на една голема ѕвезда, па 19-годишниот играч во иднина би требало да биде замена за Роберт Левандовски.
Планот на Баерн е да го купи играчот на Салцбург во следниот преоден рок, но и да го остави во Салцбург до крајот на оваа сезона.
