Реал Мадрид во не сосема идеална форма утре го пречекува англискиот првак Манчестер сити, во првиот меч од осминафиналната рунда во ЛШ. Предизвикот е еднакво голем и за двете екипи, но капитенот на Кралевите тврди дека е подготвен да се соочи со опасните Граѓани.
Иако Реал изминатиов викенд загуби од Леванте и го препушти лидерското место на Барселона во Ла Лига, во дуелот против Манчестер сити треба да го покажат квалитетот со којшто располага Зинедин Зидан.
„Кога ситуацијата е тешка, кога една грешка може скапо да ве чини, тогаш на терен излегуваат возрасните, а децата го отстапуваат местото. Време е да престанеме со приказни и да покажеме што знаеме“, истакна Рамос.
За двомечот против Сити, како и за Ел Класико наредната недела, Зинедин Зидан нема да смета на Еден Азар, а најверојатно Герет Бејл утре ќе биде во почетниот состав.
„Не е моја задача да коментирам што прават играчите во приватниот живот. Сите знаеме кој тим го претставуваме, за чиј дрес се бориме на терените. Жал ми е што ситуацијата со Азар е лоша, но имаме тренер кој е подготвен за секоја ситуација и знае што прави“, додаде капитенот на Кралевите.