Во Реал Мадрид му пркосат на суеверието, па одлучија сепак да се сместат во хотелот „Титаник“ во Ливерпул, и тоа непосредно пред 109-годишнината од потонувањето на најпознатиот прекуокеански брод во историјата во Атлантскиот океан. „Титаник“ потона ноќта помеѓу 14 и 15 април, а Реал му гостува на Ливерпул на 14.
Мадриѓаните попладнево стигнаа во Ливерпул и се сместија во хотелот кој е луксузен и направен одамна во чест на некои од загинатите во трагедијата која се случи пред повеќе од еден век. Хотелот е покрај Ирското море и на три километри од стадионот „Енфилд“.
Реал не гостувал во Ливерпул уште од 2014 година, кога победи со 3-0, но сега мадриѓаните се со некомплетна одбрана и утревечер ги чека тешка задача да ги одбранат оние 3-1 од пред една недела, а олеснителна околност им е што трибините ќе бидат празни.
Бродот за кој се тврдеше дека нема шанса да потоне, сепак заврши на дното на океанот. Одлуката на Реал да се смести во „Титаник“ предизвика разни шеговити коментари на социјалните мрежи.