Многу реакции предизвика изборот на германскиот сајт „Трансфермаркт“ на најскапата идеална постава од фудбалери кои останаа во игра за титулата во Лигата на шампионите.
Сајтот е специјализиран за проценка на вредноста на фудбалерите, што сепак не значи дека сумите се реални. Реакциите најмногу се однесуваат на изоставувањето на Кристијано Роналдо од идеалните 11, а според коментарите на социјалните мрежи, и потценувањето на Лионел Меси.
Аргентинецот е најскап и проценет на 160 милиони евра, а остри се коментарите со најчесто поставуваното прашање. Зарем разликата меѓу Меси и Кејн е само 10 милиони евра?
Само за потсетување, отштетната клаузула за Аргентинецот вклучена во неговиот актуелен договор со Барселона е 700 милиони евра. Кејн го продолжи договорот со Тотенхем до 2024 година, без да се вклучи и отштетна клаузула во него.
