Екипата на Севилја се пласираше во осминафиналето на шпанскиот Куп, откако без многу проблеми со 2:0 победи на гостувањето кај Сарагоса. Фаворитот постигна по еден гол во двете полувремиња и рутински го реши прашањето околу победникот.
Коунде погоди за 1:0 во 31 минута, а сите дилеми околу победникот ги реши Рафа Мир со погодок во 69 минута. За разлика од Севилја, Вилјареал испадна од Купот, откако на гости со 1:2 загуби од Спортинг Хихон. Жолтата подморница „потона“ на гостувањето кај второлигашот, иако фаворитот прв постигна гол.
На Кадиз и Жирона доволно им беше да постигнат по еден гол за да се радуваат на победи во дуелите против Фуанлабрада и Осасуна. Вчера пласман во следното коло од Купот обезбедија и Валенсија, Мајорка, Сосиедад, Барселона, Реал Мадрид, Балеарес, Бетис и Рајо Вајекано.
Вечерва се игра дуелот меѓу третолигашот Рајо Маџадахонда и Атлетико Мадрид.
