Шкендија ќе мора да надополнува два гола негатива во реваншот во Скопје ако сака да го задржи европскиот сон. Македонскиот шампион скапо ги плати грешките во одбраната и го загуби првиот меч на гостувањето кај Рига со 2-0 во квалификациите од Конференциската лига.
Составот на Ернест Ѓока веќе по воведните 15 минути мораше да брка резултатски недостаток кога домаќините ја искористија првата посериозна шанса од корнер, а Весли беше највисок во скокот и погоди за 1-0.
Набрзо по стартот на второто полувреме, летонскиот шампион стигна и до сигурни 2-0 преку Вакубалко, кој искористи подарок од Рамадани и неговата кардинална грешка во опасната зона.
Голот за 2-0 можете да го видите ТУКА.
Реваншот е предвиден за идниот четврток, со почеток во 20 часот на Националната арена во Скопје.
Во меѓувреме Риека на Крсте Велковски триумфира со идентични 2-0 на гостувањето кај Гзира, а македонскиот дефанзивец остана на клупата за резерви.
Во дресот на Спартак Трнава дебитираше Милан Ристовски, нашиот напаѓач како стартер играше до 75-тата минута во ремито без голови против Сепси.