По срамната елиминација во квалификациите од Лигата на шампиони, Шкендија сега продолжува во новата Конференциска лига на УЕФА, каде за противник го има тимот на Рига од Летонија. Во Конференциската лига е и Шкупи, единствениот македонски претставник кој успеа да елиминира противник во Европа ова лето. Шкупи во второто претколо ќе игра против Санта Клара од Португалија.
Доколку Шкендија и Шкупи ги поминат овие ривали, ќе продолжат во третото квалификациско коло, а ждрепката за паровите од оваа рунда ќе се знаат денеска по 14 часот. Шкупи е во улога на носител, а доколку го елиминира португалскиот ривал има седум можни ривали во следното коло.
Шкендија е во групата на шампиони кои испаднаа, па во нивниот случај нема да има делење на носители и неносители. Ако тетовци успеат да ја елиминираат Рига, за противник ќе имаат еден од осумте победници во другите двобои или Шамрок кој е директно пласиран во третото квалификациско коло.
Освен ждрепката во Конференциската лига која ќе започне во 14 часот, денеска ќе има ждрепки и за квалификациите во Лигата на шампиони (во 12 часот) и во Лигата на Европа (13 часот). Македонија нема свои претставници во квалификациите за ЛШ и ЛЕ.