Шведска лесно ја победи Ерменија со 3:1 и ѝ го покажа патот на Македонија, како треба да одигра во септември против лидерот во нашата група во квалификациите за Мундијалот во Катар.
Швеѓаните апсолутно доминираа и веќе во првото полувреме можеа до врв да ја наполнат мрежата на Ерменците.
Напаѓачот на Лајпциг, Емил Форсберг со убав погодок од слободен удар во 16. минута и донесе предност на Шведска во последниот тест меч пред настапот на Европското првенство.
Голот на Форсберг од слободен удар можете да го погледнете ОВДЕ. Потоа прецизен беше и Маркус Даниелсон и погоди со удар со глава во 34. минута за 2:0.
Веднаш потоа во 39. минута Себастијан Ларсон промаши пенал, па Ерменците добро минаа во првото полувреме со само два гола негатива.
Гостите одиграа нешто подобро во второто полувреме и постигнаа и почесен гол во 64. минута. Стрелец беше Вахан Бичакчјан за надеж на Ерменците дека можат да избегнат пораз.
Но, Швеѓаните повторно нападнаа и во финишот на пријателскиот меч во Солна постигнаа и трет гол за конечен резултат од 3:1.
Ова беше само вториот пораз за селекторот Хоакин Капарош на вкупно 10 меча како кормилар на Ерменија, а единствениот претходно му е од Македонија со 2:1.
Ерменците се со Македонија во Ј групата во квалификациите за Мундијалот во Катар во 2022 година и по три кола се лидери со три победи. Македонија е втора со шест бода, колку што имаат и Германците, а токму Ерменија ни е следен противник, во Скопје на 2. септември.
