Ракометната репрезентација на Португалија во Скопје ги прави последните подготовки пред утрешниот дуел против Македонија, во СРЦ „Борис Трајковски“, во квалификациите за пласман на Европското првенство 2024 година. Македонија и Португалија имаат максимални четири бода по двете одиграни кола досега и тоа се селекциите кои се фаворити за освојување на првите две места, кои водат место на континенталниот собир.
Сепак, важно е и кој ќе биде прв, а кој втор во групата. Португалија е фаворит, но Диого Силва знае дека Македонија е опасен ривал, кој не смее да се потцени.
„Македонија е репрезентација која има голема традиција. Можеби во моментов не се во најдобра форма, но знаеме дека секогаш е тешко да се игра против нив, посебно кога играат на домашен терен. Некои од нас веќе имаат играно на тој терен во Скопје и затоа мора да бидеме максимално концентрирани, да се покажеме во најдобро светло, ако сакаме да постигнеме добар резултат“, вели Силва во пресрет на двомечот против Македонија.