Женската македонска ракометна репрезентација до крајот на оваа недела треба да потврди учество на уште едно Европско првенство. Македонија е во квалификациска група заедно со шпанија, Азербејџан и Литванија, а по четири одиграни средби, нашите дами се на второто место со четири бода. Шпанија е убедлив лидер со максимални 8 бода и сигурен учесник на ЕП, додека по два бода имаат Литванија и Азербејџан.
До крајот на квалификациите, Македонија на 3 април ќе гостува кај Азербејџан во Баку, селекција која пред шест месеци во Скопје ја победивме со убедливи 40:17. Крајот на квалификациите ќе биде на 7 април со мечот во салата „Борис Трајковски“, каде ќе ни гостува Литванија. Оваа репрезентација на гости ја победивме со 31:28 и сега в недела на наш терен треба да го прославиме пласманот на уште едно големо натпреварување.
Влезот за овој меч ќе биде бесплатен што е уште еден мотив плус салата да биде полна и репрезентативките со аплауз да бидат испратени кон нов успех.