Фановите на Нирнберг во првото полувреме на натпреварот против Борусија Дортмунд неколку пати го прекинуваа мечот фрлајќи црни тениски топчиња на теренот, а извадија и навредливи пароли кон Германската фудбалска федерација, на која ѝ се лутат што ги става да играат во лошиот понеделнички термин.
Не е првпат сезонава да има протести на темата играње во понеделник вечер. Пред една недела, навивачите на Алавес во Шпанија му направија „погреб“ на фудбалот со кореографија, а поддржувачите на Нирнберг вечерва протестираа поинаку. На теренот фрлаа црни тениски топчиња, со што веројатно сакаа да покажат дека понеделник е ден за почеток на тениски турнири, а не за играње прволигашки мечеви од една од петте најсилни лиги во Европа. Со ова, навивачите му направија проблем на својот клуб бидејќи сигурно организаторот ќе добие казна, но психолошки го разнишаа и гостинот од Дортмунд.
Во последните секунди од првото полувреме, Борусија требаше да изведе корнер, но кон корнер-знаменцето полетаа десетици топчиња и судијата реши да не дозволи изведување на корнерот и играчите ги прати во соблекувална.