Стадионот „Шукру Сарачоглу“ во Истанбул на кој утре од 18.30 часот ќе се игра пријателски натпревар помеѓу Турција и Македонија буди пријатни спомени за неколку наши репрезентативци. Се надеваме и утревечер задоволни ќе го напуштат теренот на кој имале радости во минатото.
Дарко Велковски, Бобан Николов и Висар Муслиу беа дел од легендарниот тим на Вардар во сезоната 2017/2018 кога тимот играше во групната фаза од Лига Европа, а во квалификациите за тоа натпреварување во летото 2017 го елиминираше Фенербахче со победа на истиот стадион на кој ќе играме утре.
Што се однесува до Елиф Елмас и Езџан Алиоски, тие го носеа дресот на славниот турски клуб и на „Шукру Сарачоглу“ се чувствуваат како домаќини.
Џани играше само една сезона во Фенер (2022/2023) како позајмен од Ал-Ахли и го освои Купот на Турција.
Елмас од 2017 до 2019 беше член на Фенербахче, и одигра 34 меча во турската Суперлига во дресот на Канаринците, пред да направи трансфер во Наполи.
