Фудбалерите на Динамо синоќа околу 1:30 часот се вратија во Загреб по големата победа од 1-3 против Хајдук во Сплит во дербито од 33-то коло на Суперспорт ХНЛ, во еден од најважните дерби натпревари на сезоната. Головите за Динамо ги постигнаа Ронел Пјер-Габриел во 51-та минута, Сандро Куленовиќ во 64-та минута и Петар Сучиќ во 101-та минута од судиското продолжение, додека за Хајдук стрелаше Ливаја во 56-та минута.
Динамо слави враќање на првото место во завршницата од неизвесната трка за титулата
Актуелниот шампион Динамо со оваа победа, три кола пред крајот и по седум месеци, се врати на врвот на табелата со 58 бодови. Ријека и Хајдук имаат два бода помалку, но Ријека има и натпревар помалку. Таа денеска игра дома против Горица, и со победа може повторно да се искачи на првото место. Со победи во сите преостанати четири натпревари, Ријека би можела да стане шампион, но ја чека и тешко гостување кај Хајдук.
Динамо, пак, ги игра сите три преостанати натпревари на „Максимир“. Покрај тоа, според актуелната форма и резултатите на трите претенденти за титулата, Динамо е во најдобра позиција. До таа предност ги доведе победата на „Пољуд“, која беше бурно прославена со околу две илјади навивачи „Бед Блу бојс“ кои го наполнија југозападниот дел од стадионот на Хајдук. Но, славеа и во Загреб заедно со играчите.
„Бојсите“ навиваа во Сплит, а потоа им приредија дочек на хероите во Загреб
Автобусот со играчите и стручниот штаб на Динамо се врати доцна во ноќта на „Максимир“, каде што ги пречекаа неколку стотици воодушевени навивачи. Тие со песни и факели ги поздравија победниците од Сплит.
Кога на вратата на автобусот се појави Стефан Ристовски, навивачите започнаа да пејат: „Една Торцида ќе плаче оваа ноќ…“.
Сите играчи беа поздравени со аплауз и скандирања, а најголемиот јунак беше Сандро Куленовиќ, кој втора пролет по ред постигна решавачки гол на „Пољуд“.
