Брера Струмица му го нанесе осмиот пораз на Вардар сезонава во Првата македонска фудбалска лига. Струмичани победија со 1-0 со голот на Ивковиќ во 19-тата минута и го симнаа најтрофејниот македонски клуб на последно место на табелата, со оглед на тоа дека Воска спорт освои три бода против Шкупи и ги прескокна Вардар и Тиквеш.
Лидерот Работнички водеше, но освои „само“ бод во Кратово, во дербито против третопласираниот Силекс, а тоа го искористи Шкендија, која со триумфот над Беса дојде само на бод негатива зад Работнички.
Задоволен може да биде и Пелистер, кој остана непоразен против Гостивар. За битолчани ова беше дури седмо реми во 12 кола сезонава, а четврто по ред.
РЕЗУЛТАТИ: Гостивар – Пелистер 0-0, Шкендија – Беса 2-1, Силекс – Работнички 1-1, Тиквеш – Струга 0-1, Вардар – Брера Струмица 0-1, Воска спорт – Шкупи 3-1.
