Прогнозерите се во одлична форма од почетокот на третата сезона на Спортска прогноза, па малку фалеше во колото што заврши вчера да биде доделен и првиот „ајфон 11“.
Тоа е вистинско охрабрување дека и не е толку тешко да се стигне до максимален број на погодени натпревари, а нова шанса за сите учесници во бесплатната игра на Спорт Манија и Sport Life да прогнозираат е во третото коло, што е достапно за типување од денеска од 14 часот.
Стандардно ќе имате на располагање период од пет дена до сабота до 15.30 часот, кога почнува првиот натпревар што ни е на менито за третото коло на Спортска прогноза.
Авантурата почнува на „Бај арената“ во Леверкузен, со мечот меѓу Баер и Лајпциг. Дербито во Бундеслигата ќе биде возбудливо, а само половина час подоцна во Англија ќе играат две екипи кои се во топ-форма.
Кристал палас му е домаќин на Евертон. Има уште два интересни дуели од Франција и од Шпанија, па почеток во сабота со четири погодоци би бил идеален во обид да се остане во игра за премијата „ајфон 11“.
Во миксот од различни првенства во недела има 7 натпревари што се на менито на тринаесетката, а во фокусот ќе биде турското дерби меѓу Галатасарај и Фенербахче и мечот меѓу Рома и Јувентус во Серија А.
Понеделник е ден за завршница, а таа ќе биде спектакуларна со последен меч во третото коло на Спортска прогноза на „Енфилд роуд“ меѓу Ливерпул и Арсенал.
Како и секогаш, за вас подготвивме и два резервни пара, кои носат важни поени во битката за Генерален пласман и за конечен победник во третата сезона на Спортска прогноза.