Торонто мејпл лифс лесно стигна до шестиот триумф сезонава, и тоа во низа, откако славеше со конечни 4-1 против Лос Анџелес кингс. Домаќините уште во првата минута го отворија резултатот, а во победата придонесе Капанен со два гола, по еден постигнаа Мерлоу и Марнер, додека Ковалчук во последниот период постигна почесен погодок за „кралевите“.
Торонто со оваа победа се зацврсти на првата позиција на табелата во Источната конференција, само со еден пораз од седум меча имаат 12 бода, три повеќе од второ пласираниот состав на Каролина.
„Предаторите“ од Нешвил остварија серија од три победи, совладувајќи ја екипата на Минесота со 4-2. Откако и двете екипи постигнаа по еден гол во првиот период, искористувајќи ги ситуациите со играч повеќе, домаќините го направија првиот чекор кон победата со два гола во вториот период, додека Саломаки на неколку секунди пред крајот погоди празен гол и ги реши дилемите на средбата.
Нешвил по поразот од Калгари, им врати на победите, па така изби на челната позиција во Западната конференција со 10 бода од шест меча.
Резултати НХЛ:
Торонто мејпл лифс – Лос Анџелес кингс 4-1
Нешвил предаторс – Минесота вајлд 4-2
Монтреал канадиенс – Детроит ред вингс 7-3
Отава сенаторс – Далас старс 4-1
