Англискиот вицешампион Арсенал е заинтересиран до крајот на летниот преоден рок во своите редови да го донесе фудбалерот на Барселона, Ансу Фати, објавија шпанските медиуми.
Според медиумите, претставници на Арсенал наводно разговарале со агентот на фудбалерот, Жорж Мендеш, за можноста шпанскиот репрезентативец до први септември да се пресели на „Емирати“.
Тренерот на Барселона, Чави Ернандес, иако изјавува дека е задоволен од Фати, не го стави младиот фудбалер во првиот тим на вчерашниот натпревар против Кадис, иако неколку играчи од средниот ред беа повредени.
Шанса пред Фати доби 16-годишната сензација Ламин Јамал. Фати влезе во игра во 73-тата минута, а во првото коло од Ла Лига против Хетафе одигра само 11 минути.
Фати има договор со Барселона до 2027 година, но нема да претставува изненадување доколку до крајот на преодниот рок си замине од шпанскиот шампион. Освен Арсенал, интерес за Фати пројавуваат и Манчестер јунајтед и Тотенхем.
